- താങ്കള് ഒരു ബ്ലോഗര് ആണോ ?
- അല്ല.!
- ബ്ലോഗ് എഴുതിയിട്ടില്ലേ?
- ഉണ്ട് അതുകൊണ്ട് ബ്ലോഗര് ആവുമെങ്കില് അതെ.
- താങ്കള് നേരെ ചൊവ്വേ കാര്യങ്ങള് പറയില്ല എന്ന ഒരു വിമര്ശനം കേള്ക്കുന്നത് ഇത്തരം മറുപടി കാരണമാണോ?
- ഉണ്ടോ? എനിക്കറിയില്ല. പിന്നെ മറുപടി ചോദ്യങ്ങളെ ആശ്രയിച്ചായിരിക്കും. താങ്കള് ഒരു ബോറന് ആണോ എന്ന് ചോദിച്ചാല് എന്താണ് താങ്കളുടെ മറുപടി? ഇതിനര്ത്ഥം താങ്കള് അങ്ങനെ ആണ് എന്ന് ഞാന് വിശ്വസിക്കുന്നു എന്നല്ല...
- സമ്മതിച്ചു. ഇനി നമുക്ക് കാര്യത്തിലേക്ക് കടന്നാലോ? അഭിമുഖത്തിലേക്ക്?
- അപ്പൊ ഇതുവരെ ... ചോദിച്ചതും?...
- ഇത് താങ്കളുടെ വായനക്കാര്ക്ക് വേണ്ടിയാണ്. അവര്ക്ക് താങ്കളെ പറ്റി അറിയാന് താല്പര്യം ഉള്ള കാര്യങ്ങള്.
- ഈയുള്ളവനും വായനക്കാരോ? ഇന്ന് ഏപ്രില് ഒന്ന് അല്ല എന്ന് വിശ്വസിക്കട്ടെ. ക്ഷമിക്കണം താങ്കള്ക്ക് കുടിക്കാന് ചായയോ കാപ്പിയോ അല്ലെങ്കില് മറ്റു വല്ലതും? അതായത് നാരങ്ങ വെള്ളം അല്ലെങ്കില് മോരോ എന്നാണ് ഉദ്ദേശിച്ചത്.
- ഒന്നും വേണ്ട നന്ദി.
- സന്തോഷം!!!
- ബ്ലോഗ് എഴുത്തിനെ പറ്റി എന്താണ് അഭിപ്രായം? എന്താണ് അതിന്റെ ഗുണം? താങ്കളുടെ നിരീക്ഷണത്തില്?
- നല്ല അഭിപ്രായം.
- ക്ഷമിക്കണം. ഒന്ന് വിശദീകരിച്ചാല് നന്നായിരുന്നു. ഇത് എന്റെ ആദ്യത്തെ അഭിമുഖം ആണ്. തുറന്നു പറയട്ടെ, ഇത് എങ്ങനെ എന്നതിനെ ആശ്രയിച്ചാണ് എന്റെ ഭാവി.
- അത് ആദ്യമേ മനസ്സിലായി. ഭാവി എങ്ങനെ ആയിത്തീരും എന്ന് . പിന്നെ ഈ ബ്ലോഗ് എന്ന് പറയുമ്പോള് .... .... അതായത് ,,,, ക്ഷമിക്കണം ആരോ ഫോണ് വിളിക്കുന്നു .... ഒന്ന് നോക്കട്ടെ ?!!......................................................................................................................................... അപ്പോള് നമ്മള് എവിടെ യാണ് പറഞ്ഞു നിര്ത്തിയത്?
- ഈ ബ്ലോഗ് എന്ന് പറയുമ്പോള് എന്നല്ലേ സര്?
- അതെ നന്ദി. മറ്റുള്ളവരെ അതായത് വായനാ കുതുകികളെ അവര് ആവശ്യപ്പെടാതെ തന്നെ ഒരു കാശും ചിലവാക്കാതെ ബോറടിപ്പിക്കാം എന്നതാണ് ഒരു ഗുണം. അടുത്തത് നിങ്ങള് എഴുതുന്നത് എന്ത് ചവറ് ആയാലും പബ്ലിഷ് ചെയ്യാന് ചെരുപ്പിന്റെ തേയ്മാനം ആവശ്യമില്ല എന്നതാണ്. പിന്നെ ഏതെങ്കിലും നല്ല രണ്ടു അഗ്ഗിഗട്ടെരില് അഗ്ഗ്രിഗേറ്റ് ചെയ്താല് പണിയുടെ രണ്ടാം ഘട്ടം കഴിഞ്ഞു. " അല്ല!!...ഹലോ... താങ്കള് കേള്ക്കുന്നുണ്ടോ ?... ഈ ഇന്റര്വ്യൂ എന്നും പറഞ്ഞു പിടിച്ചിരുത്തിയിട്ടു... ഒടുവില് സംവിധായകനോട് കഥ പറഞ്ഞു കേള്പ്പിക്കാന് പോണ പോലെ ആവരുത്.
- ഇല്ല സര്. കേള്ക്കുന്നുണ്ട്? .... കൂട്ടത്തില് ഒന്ന് ചോദിക്കട്ടെ? സര് സിനിമക്ക് കഥ എഴുതാന് ശ്രമിച്ചിരുന്നോ ?
- ഞാന് നേരത്തെ പറഞ്ഞു... നേരെ ചൊവ്വേ ഉള്ള കളി മതി എന്ന് .....
- സോറി സര് .. സര് തുടരൂ....
- സര് എന്നതിന് stupid idiot Rascal എന്നും പറയും. അത് കൊണ്ട് താന് ഇടയ്ക്കു പുട്ടിനു തേങ്ങ ഇടണ്ട.... നമ്മള് എവിടെ യാ നിര്ത്തിയത്??
- പുട്ടിനു തേങ്ങ ... അല്ല സോറി... സര്... ബ്ലോഗിന്റെ രണ്ടാം ഘട്ടം കഴിഞ്ഞു..
- ഹും ... ( നീ എന്നെ കൊണ്ട് മിക്കവാറും അത് ചെയ്യിക്കും ) ഈ ബ്ലോഗിന്റെ മൂന്നാം ഘട്ടം എന്ന് പറയുന്നത് ആജീവനാന്തം മുടങ്ങാതെ ബൂലോകത്തില് ഉള്ള കാലം ചെയ്യേണ്ടതാണ്. ബൂലോകത്തിലെ വമ്പന് മാരുടെയും പ്രതിഭകളുടെയും തൊട്ടു ഇസ്പേഡ് ഏഴാം കൂലികളുടെ ബ്ലോഗ് വരെ വായിക്കുക. എന്തെങ്കിലും ഒക്കെ കമ്മന്റ് സ്വന്തം നാമത്തില് നിക്ഷേപിക്കുക .. ദിവസം മൂന്നു നേരം മുടങ്ങാതെ. ഒന്നും പറ്റിയില്ലെങ്കില് ഇങ്ങനെ ഒരു good ഉം :) ഇങ്ങനെ ഒരു ചിരിയുമെങ്കിലും നിക്ഷേപിക്കുക. മുട്ടുപായില് ഇങ്ങനെ എന്നും ചെയ്തോളു...വേറെ ഒരു അമ്പലത്തിലും പോകണ്ട....താങ്കള് ഒരു കൊച്ചു സംഭവം ആയി കഴിഞ്ഞു. പതിയെ താങ്കളുടെ കമന്റ് കളത്തിലും വരും അഭിപ്രായങ്ങള്. ഇത് വെറുതെ കിട്ടുന്നതല്ല. " ഈ വാല്മാക്രി എന്റെ കഴിഞ്ഞ രണ്ടു കഥകള്ക്കും കമന്റ് ഇട്ടതല്ലേ. ഇവനൊന്ന് ഇട്ടു കൊടുത്തേക്കാം. എന്നാലെ അടുത്തതിനു വല്ലതും കിട്ടൂ" . അങ്ങനെ ഇതൊരു കൊടുക്കല് വാങ്ങല് പ്രസ്ഥാനം ആയി വളരും. അതല്ലെങ്കില് വേറെ ഒരു വഴി ഉണ്ട്. ഒരു കാല്മൂക്കന് രാജാവ് ആയി കഴിഞ്ഞാല് പിന്നെ ഒരു രണ്ടു വരി എഴുതുക പക്ഷെ ഒരു പ്രത്യേക രീതിയില് ചെയ്യണം എന്ന് മാത്രം. കമന്റ് കൊട്ട നിറച്ചു വരാന് തുടങ്ങും. ഉദാഹരണം പറയാം. ഒരു പുതിയ പോസ്റ്റ് ഇടുക " സ്ത്രീ സ്വാതന്ത്യം എത്ര വരെ ആവാം? ഇപ്പോള് തന്നെ കേരളത്തില് അധികമാണ് എന്ന് താങ്കള് വിശ്വസിക്കുന്നുണ്ടോ? പ്രതികരിക്കുക.... അല്ലെങ്കില് " ശരിക്കും കേരളത്തില് സ്ത്രീ പീഡനം നടക്കുന്നുണ്ടോ? അതോ കെട്ടി ചമാച്ചതാണോ? .... എന്റെ പോന്നു സുഹൃത്തെ . പോസ്റ്റ് പബ്ലിഷ് ചെയ്തു ഒരു സെക്കന്റ് കഴിയണ്ട... ബ്ലോഗികളും ബ്ലോഗന് മാരുമായി ഒരു വരവുണ്ട് നിങ്ങളുടെ കമന്റ് ബോക്സില് ...നമ്മള് വെറുതെ നിന്ന് കൊടുത്താല് മതി. വല്ലപ്പോഴും ചെറിയ മറുപടി കമന്റുമായി ഇടയ്ക്കു ഒന്ന് ഇടിച്ചു കയറുക. വലിയ പ്രയാസമാവും തിരക്കിനിടയില് സ്വന്തം സൈറ്റില് കയറിപ്പറ്റാന്. " എന്നിട്ട് നന്ദി... നന്ദി ...നന്ദി ...എന്ന് പറയുക. " ഇടയ്ക്കു ചര്ച്ച വഴിമാറി പോവാതെ കാലിക്കൂട്ടങ്ങളെ .. സോറി കുഞ്ഞാടുകളെ തെളിച്ചു കൊണ്ട് നടക്കുക... ഇത്രയേ ഉള്ളൂ പണി. പിന്നെ ഒന്നും നോക്കണ്ട .. എവിടെ ചെന്നാലും ഏതു സദസ്സില് ചെന്നാലും പേരാണ്... പ്രത്യേകിച്ചും ഗള്ഫ് മലയാളി അഥവാ പ്രവാസി ആണെങ്കില്. ആളുകള് നമ്മളെ തിരിച്ചറിഞ്ഞില്ലെങ്കില് ലവന്മാര് ആ പണി ഏറ്റെടുത്തുകൊള്ളും. " ഇത് Mr രാമന് / അല്ലെങ്കില് പ്രേമന് ... അറിയില്ലേ ... ഊരാളന് എന്ന പേരില് ബ്ലോഗ് എഴുതുന്ന" ...!!! അത് ശരി ...അറിയാം വായിച്ചിട്ടുണ്ട്...എന്ന മറുപടിയോടെ മറ്റേ ലവന് നമ്മളെ ഒന്ന് തൊഴും. അതിനെക്കാള് താഴ്ന്നു അങ്ങോട്ടും ഒന്ന് തൊഴുക.. അല്ല തോഴുതുകൊണ്ടേ ഇരിക്കുക ... മതി. YOU ARE IN.... താങ്കള് ഇപ്പോള് ഒരു ആപ്പ സാദാ പ്രവാസി അല്ല. സമൂഹത്തിലെ അപചയങ്ങള് ക്കെതിരെ നിരന്തരം തൂലികയിലൂടെ വാളോങ്ങി കൊണ്ടിരിക്കുന്ന ഒരു പ്രവാസി നിരൂപകനാണ്, ചിന്തകനാണ്, പ്രവാസി സാംസ്കാരിക നായകനാണ്.
- സര് ഒരു മിനുട്ട് ഒന്ന് ഇടപെടട്ടെ? താങ്കളുടെ വീക്ഷണങ്ങള് വളരെ അര്ത്ഥവത്തായി ജനങ്ങളില് പ്രതിഫലിക്കട്ടെ. ഒപ്പം ഒന്ന് ചോദിച്ചോട്ടെ? ഒരു പക്ഷെ അനുഭവങ്ങളുടെ തീച്ചൂളയില് നിന്നാണോ ഈ പ്രതികരണവും?
- മനസ്സിലായില്ല...!!! താനെന്തിനാ അനുഭവങ്ങളുടെ തീ ചൂള എന്നൊക്കെ പറഞ്ഞു ഏഷ്യാനെറ്റില് ആ താടി ക്കാരന് ചെറിയ മനുഷ്യന് കാണിക്കുന്ന പോലെ കൈ ഉള്ളം കൈയ്യിലിട്ട് തിരിച്ചു കാണിക്കുന്നത് ? ന്താ ആളെ കളിയാക്കാ....
- അല്ല സര് ഒരിക്കലും അല്ല താങ്കള്ക്ക് ബ്ലോഗില് കമന്റ് എല്ലാം കുറവാണോ എന്ന് ചോദിക്കാന് ഇരിക്കയായിരുന്നു?
- തന്നോട് പല തവണ പറഞ്ഞു... ഒരു മാതിരി ഈ ആക്കുന്ന പരിപാടി വേണ്ട എന്ന്. എനിക്ക് കമന്റ് ഉണ്ടോ എന്ന് നോക്കാന് ഞാന് തന്നെ എല്പിച്ചോ?
- അല്ല സര്!!!...അങ്ങനെ ഒന്നും...
- വേണ്ടെടോ? എനിക്ക് വേണ്ട കമന്റ്.!! ന്നാലോ? സര്ഗബോധം വേണം സര്ഗബോധം... ഉണ്ടോ അത് തനിക്ക്? ഞാന് ആരാന്നാ ഇയാള് വിചാരിച്ചത്? ഇപ്പൊ കുറച്ചായി ഒന്നും എഴുതുന്നില്ല എന്ന് വച്ച്??
- സര് അത് തന്നെ ആണ് ഞാന് ചോദിക്കാന് ഇരുന്നത്. താങ്കളുടെ പുതിയ സൃഷ്ടികള് ഒന്നും വരുന്നില്ല എന്നത് താങ്കളുടെ ആരാധകരെ ശരിക്കും വിഷമിപ്പിക്കുന്നുണ്ട്. പലരും താങ്കളുടെ സുഹൃത്ത് ഏകലവ്യനോട് പോലും ചോദിച്ചു.... സര് ഇങ്ങനെ വികാരപ്പെട്ടു നോക്കരുത് സര്..
- ( ഒരു പത്തു നിമിഷത്തിനു ശേഷം പൂര്വ സ്ഥിതിയില് വന്നതില് പിന്നെ) ശരിയാടോ... ഞാന് പറഞ്ഞില്ലേ ഒരു സാഹിത്യകാരന് സര്ഗ ചിന്ത വരണം ... പിന്നെ അതിങ്ങനെ മനസ്സില് തിങ്ങി നിറയണം. അത് പിന്നെ ഒരു ഒഴുക്കായി പേനതുംബിലൂടെ വന്നു ചേരണം. അതിനു അതിന്റേതായ സമയം എടുക്കും മനസ്സിലായോ? അല്ലാതെ നമ്മുടെ വെടി തീര്ന്നു എന്ന് താന് എഴുതി പിടിപ്പിക്കേണ്ട. പിന്നെ ആ നമ്മുടെ ഏകലവ്യന് . ആ ചിത്രണം ബ്ലോഗനല്ലേ?. എടൊ അവനു ആ ടെലിസ്കോപ്പ് കാമറ തൂക്കി ഒന്ന് കടലിലേക്ക് നോക്കി ഒന്ന് ക്ലിക്കി " നീല സാഗരം" എന്നോ അതോ ഒരു ഓന്തിനെ സൂം ചെയ്തു ക്ലിക്കി വന്ന്യ സൌന്ദര്യം എന്നോ ഒരു അടികുറിപ്പും ഇട്ടാല് രണ്ടു പോസ്റ്റ് ആയി. കമന്റ് ഇഷ്ടം പോലെ വരും. ആകെ രണ്ടു മിനിട്ട് പണിയേ ഉള്ളൂ. എന്റെ ശിഷ്യന് ആയതുകൊണ്ട് പറയുകയല്ല കേട്ടോ? അവന് ആ പണിയില് ആള് പുലിയാ ...
- പുള്ളി സാറിന്റെ ശിഷ്യന് ആണോ?
- നീ ഇനി ഇതാരോടും പറയണ്ട. ഫോട്ടോ പരിപാടി നമ്മക്ക് അറിയില്ലെങ്കിലും അവനെ ബ്ലോഗ് എല്ലാം പഠിപ്പിച്ചു കൊടുത്തത് ആരാ ??
- ആരാ സര്?
- ഞാന് തന്നെ. അവനോടു ചോദിക്കുകയൊന്നും വേണ്ട. അവന് ചിലപ്പോ സമ്മതിക്കില്ല . പക്ഷെ സത്യമാണ്. നീ *(ഇതില് എഴുതുകയും ചെയ്യല്ലേ!!! )
- സര് ഒരു ചോദ്യം ...
- വേണ്ട ഇനി നാളെ ആക്കം ബാക്കി. ആദ്യ എപ്പിസോടിനു ആയില്ലേ?
- ആയി
- ബാക്കിക്ക് നീ നാളെ വാ... പിന്നെ പോവുമ്പോ എന്റെ ആ പേന അവിടെ തന്നെ വച്ചേക്കണേ !!! (ദരിദ്ര വാസി ഒരു പേന പോലുമില്ല ഇത് ആത്മഗതം ആണേ )
- ശരി സര് ഒരു ഗ്ലാസ് വെള്ളം കിട്ടിയാല് നന്നായിരുന്നു.
- ഇപ്പൊ തരാം പെണ്ണും പിള്ള ഇവിടെ ഇല്ല നാട്ടില് പോയതാ... എനിക്ക് ഒറ്റക്കിരുന്നു എഴുതിയാലേ സര്ഗവാസന വരൂ.
- അത് പറഞ്ഞപ്പോള് ആണ് ഓര്ത്തത് സാറിന്റെ കുടുംബ ജീവിതത്തിലേക്ക് ഒരു എത്തിനോട്ടം ... അത് നാളെയാവാം അല്ലെ?
- തല്കാലം നീ അങ്ങനെ എത്തി നോക്കണ്ട... നാളെ വാ അപ്പോള് പറയാം ബാക്കി.
9 comments:
പ്രിയ സുഹൃത്തുക്കളെ ഒരു പാട് നാളുകള്ക്കു ശേഷം ഒരല്പം ആക്ഷേപഹാസ്യം ആയി ഒരു പോസ്റ്റ് ഇടുകയാണ്. ഒന്നും ഉദ്ദേശിച്ചല്ല ഉള്ളില് തോന്നിയത് അല്പം ഹാസ്യം ചേര്ത്ത് എഴുതി എന്നെ ഉള്ളൂ. എല്ലാവര്ക്കും എന്റെ ഈ വൈകിയ വേളയിലെ പുതുവത്സര ആശംസകള്
സ്നേഹപൂര്വ്വം
അക്കേട്ടന്
ഹലോ മാഷെ,
നല്ല നമസ്ക്കാരം ഒത്തിരി നാളായല്ലോ കണ്ടിട്ട്, നേരിട്ടും ബ്ലോഗിലും. നന്നായിരിക്കുന്നു.
എന്താ നമ്മുടെ ബ്ലോഗ് മീറ്റിന് വരാതിരുന്നത്. താങ്കള്ക്ക് തിരക്ക് കഴിഞ്ഞ് ഒഴിവുണ്ടെങ്കില് ഒരു ദിവസം കാണാം.
സ്നേഹത്തോടെ....
താങ്കളുടെ കോണ്ടാക്റ്റ് നമ്പര് ഒന്ന് തരുമോ,
Thank you ...
39305426
ഗുരുവിന് നമോവാകം,
ദക്ഷിണയായി ക്യാമറ ക്ലിക്കൂന്ന വിരലിന്റെ ഫോട്ടോസ്റ്റാറ്റ് കൊറിയറില് അയച്ചിട്ടുണ്ട്.
ഇന്റര്വ്യൂ ഏതായാലും കലക്കുന്നുണ്ട്, കുറേക്കാലമായി കാട് പിടിച്ചിരുന്ന ബ്ലോഗില് ഒരു ആളനക്കം കണ്ടതില് വളരെ സന്തോഷം. അടുത്ത പോസ്റ്റിന് അടുത്ത മകരവിളക്ക് വരെ കാത്തിരിക്കേണ്ടിവരില്ലെന്ന പ്രതീക്ഷയോടെ...
ഇന്റര്വ്യൂ ഇഷ്ടായി
ചിലതെല്ലം കുറിക്ക് കൊണ്ടു :)
മൂര്ച്ചയുള്ള ഫലിതം. :)
നന്ദി അരുണ് ... നന്ദി hAnLLaLaTh കൂടാതെ നാട്ടപ്പിരാന്തനും
എകലവ്യാ....
കുറിമാനം കണ്ടു. വെറ്റില വച്ച് തൊഴുതിരിക്കുന്നു. താങ്കളുടെ നര്മ്മത്തിന് മുമ്പില് ഈയുള്ളവന് വെറും കൊതുക്. ഇനി മുതല് പോസ്റ്റ് ക്ലിക്കാതെ എഴുതുകയും ചെയ്യ്. അങ്ങനെ നമ്മുടെയെല്ലാം കഞ്ഞിയില് പാറ്റ ഇടുകയും ചെയ്യാമല്ലോ?
വിനീതനായ
ശിഷ്യന്
നല്ല വ്യു.. കമന്റിടാന് പേടിയാവുന്നു.
Post a Comment